محمد الغول يكتب.. الرجل كائن غلبان
النهارده اليوم العالمى للرجل ، الكائن الجميل البسيط الغلبان ، اللي طموحه بيبدأ عند كنبة الانتريه مرورا بطبق الفاكهه وكوباية القهوة والسيجارة انتهاءا بالتليفزيون ، الكائن الهادي اللي مش عايز حاجه من حد ولا عايز حد يعوز منه حاجه ، الكائن المقهور اللي ضيع طفولته ومراهقته في التعليم علشان يكبر ويشتغل ويضيع الباقي من عمره شايل حمل ناس تانيين ولا فارق معاه ولا بيشتكي ولا بيندب حظه علي كدة.
الكائن الغلبان اللي نص يومه بيروح في الشغل علشان يقبض اخر الشهر فلوس يطلعها مصاريف بيت وجمعيات واقساط ، الكائن الواضح الدوغري اللي كلامه واضح وافعاله واضحه وتفسيرها سهل ومش محتاج مجهود علشان يتفهم ومش عايز حد يهتم بيه علشان يعرف هو عايز ايه ، الكائن اللي عنده المكرونه زي المحشي زي السمك زي اي حاجه المهم المعده تتملي والبطن تتنفخ شويه وخلاص ، الكائن الغير معقد اللي بيجيب اي حاجتين تلاته يحطهم علي بعض يلبسهم ويمشي الدنيا ، الكائن اللي مش عايز يعرف جيرانه قالوا ايه وعيلة امه عملوا ايه وعيلة ابوه اشتروا ايه وزمايله اتجوزوا مين واصحابه اتطلقوا ازاي ، الكائن اللي بيسمي الاشياء اسماء واضحه ومعروفه الكوتشي يعني كوتشي والجزمه يعني جزمه والقميص يعني قميص ، الكائن المقتنع وراضي بشكله ولون شعره ولون عيونه ويوم مايفكر يتجمل بيجيب معجون بتلاته جنيه علشان يحول سنانه من اللون الاصفر للون الابيض ، الكائن اللي بيعامل الناس معامله دوغري ما بيدورش علي ابراجهم واتولدوا في الصيف ولا الخريف وطبيعي ولا قيصري علشان يقرر هيعاملهم ازاي.
المفاجئة اللي كنت سايبها للاخر ، ان الراجل مابيقولش انه نص المجتمع وانه الاب والاخ والزوج و الابن والصديق لان ده طبيعي مش محتاج فكاكة يعني.
فكل سنة وكل الرجال بخير وصحة وسعادة.
