سيف زاهر : الدولة عملت اللي عليا واللاعب اللي يبيع ناديه بكره يبيع بلده

أكد النائب سيف زاهر، عضو مجلس الشيوخ، أهمية مناقشة قضايا الملف الرياضي، مشيرًا إلى أنها تمثل أمن واستقرار البيت المصري.

الجلسة العامة لمجلس الشيوخ اليوم الأحد

جاء ذلك خلال الجلسة العامة لمجلس الشيوخ اليوم الأحد، برئاسة المستشار عصام فريد، رئيس المجلس.
وقال زاهر: "النهاردة لما بنناقش ظاهرة 'المراهنات الرياضية'، احنا مش بس بنناقش ظاهرة اجتماعية، احنا بنناقش ملف مهم وخطير".
وتابع: "الدولة المصرية، بقيادة الرئيس عبد الفتاح السيسي، حاطة 'بناء الإنسان' وحماية الشباب على رأس أولوياتها، عشان كده لازم نمنع الدخلاء دول إنهم يخترقوا ملاعبنا وبيوتنا؟".

تفعيل الرقابة

وأضاف: "لذلك أتقدم بعدد من المقترحات، منها تفعيل الرقابة والتنسيق الحاسم بين وزارة الشباب والرياضة والاتحادات الرياضية، لضمان أن أي تعاقدات إعلانية لازم تحترم القوانين المصرية أولًا، مهما كانت الإغراءات المادية".
وقال سيف زاهر: "لابد من حملة توعية كبيرة، ولابد من قانون قوي يجرّم هذه المسألة، لأن النهاردة اللاعب بيبيع ناديه، اللاعب النهاردة بيبيع حريته، بكرة هيبيع بلده، فهي دي المشكلة وهي دي الخطورة".
وتابع: "بالنسبة لمراكز الشباب، أعتقد إن احنا لو عملنا 75 جلسة وقعدنا 10 سنين نتكلم مش هنلاقي حلول، لأن بمنتهى الصراحة الدولة في القصة دي عاملة اللي عليها، 4500 منشأة، ميزانية ضخمة جدًا، لا يمكن يكون الحل إن الدولة هي اللي تبني".

وتابع: "وزير الشباب والرياضة السابق ووزير الشباب والرياضة الحالي لهم كل التحية، عارفين الكلام اللي أنا بقوله، سيادة الوزير وزير الشباب والرياضة كابتن جوهر نبيل عارف الكلام ده، عارف إنك مستحيل تعمل كل مراكز الشباب دي بدون دخول القطاع الخاص، وبدون وجود نظام B.O.T يسمح بدخول القطاع الخاص بدون تحميل على المواطن، ويكون هناك نظام تسويق مختلف".
وأضاف: "أنا بقول إن الجلسة دي هنقعد فيها السنة الجاية واللي بعدها واللي بعدها، فأعتقد إن الحل إن إحنا نفكر بره الصندوق، كفاية إن إحنا نعمل ضغط على الدولة في مبالغ من الصعب جدًا توفيرها".
وتابع: "في لجنة الشباب والرياضة كان في طلب مناقشة من نائب زميل بيناقش سور بقاله 10 سنين بيطالب بيه، الراجل قاعد أهو، سور مركز شباب بقاله 10 سنين بيطالب إنه يتبني، في حضراتكم مراكز شباب أوضة وصالة عشان تدي صوت في الانتخابات، كل اللي بقوله ده كل النواب عايشينه وكل الناس عارفينه".
وأضاف: "الملف ده كله محتاج يتبص عليه نظرة تانية، ما يصحش أو ما ينفعش إنه يفضل بالشكل ده، لأن مفيش إمكانيات، وفي المحافظات لن ينصلح الحال بدون دخول القطاع الخاص أو بتسويق مراكز الشباب بالشكل المجتمعي، وفي شركات خاصة تتمنى إن يكون لها دور مجتمعي في هذا الشأن".
وتابع: "نحتاج وزارة الاتصالات تتدخل بأدواتها التكنولوجية لكي تضيق الخناق على هذه المنصات، وتمنع تداول تطبيقاتها اللي بقت أسهل من أي تطبيق تعليمي".
كما أضاف أن الدولة لديها منابر إعلامية ودينية قوية، ولا بد من توحيد الرسالة، وإفهام الشباب أن المراهنات ليست "شطارة" ولا "ربح سريع"، بل طريق للضياع والفقر.
وتابع: "احنا بنمد إيدينا للحكومة وبندعمها في اتخاذ أي قرارات جريئة تحمي شبابنا وتصون قوانيننا. هدفنا واحد، وهو إن الرياضة تظل وسيلة للرقي بعيدًا عن خراب المراهنات"