لو في حد بيهددك بصورك أو محادثات خاصة؟.. دليلك للتعامل مع ”الابتزاز الإلكتروني”
في لحظة واحدة، ممكن تتحول حياتك احدكم لكابوس بسبب شخص بيستغل صور، محادثات، أو معلومات خاصة عشان يبتزك مادياً أو معنوياً. الابتزاز الإلكتروني جريمة قذرة بتلعب على وتر "الخوف من الفضيحة".
لكن الحقيقة اللي لازم تعرفها ان القانون في صفك 100%، وسكوتك هو اللي بيقوي المبتز
خطوات عملية وقانونية لازم تعملها فوراً ومتتأخرش
1️⃣ إياك تستجيب للتهديد!
أكبر غلطة ممكن تعملها إنك تدفع فلوس أو تنفذ طلبات المبتز عشان يسكت. المبتز "بئر لا يمتلئ"، لو استجبت مرة هيطلب ألف مرة. اقطع التواصل معاه تماماً لكن ما تعملش بلوك (Block) نهائي حالياً.
2️⃣ وثق الدليل (ما تمسحش حاجة)
المحادثات، الصور، التهديدات، ولينك الحساب الخاص بالمبتز.. دي كلها أدلة إدانتك ليه. خد "سكرين شوت" (Screen Shot) لكل حاجة واحتفظ بيها.
3️⃣ القانون بيحميك (العقوبة رادعة)
القانون اعتبر الابتزاز جريمة يعاقب عليها بالحبس والغرامة. دي مش مجرد "مضايقة"، دي جريمة مكتملة الأركان تشمل "التهديد" و"انتهاك حرمة الحياة الخاصة" و"إساءة استخدام وسائل الاتصال".
4️⃣ تحرك رسمياً وفوراً إلى (مباحث الإنترنت)
توجه فوراً لمباحث الإنترنت وحرر محضر بالواقعة ومعاك كل الأدلة. البلاغات دي بتتم في سرية تامة حفاظاً على سمعة المبلغ. الدولة بتمتلك تقنيات حديثة تقدر تجيب المبتز حتى لو كان عامل حساب وهمي (Fake Account).
نصيحة أخيرة
المبتز شخص جبان بيستمد قوته من خوفك. واجه خوفك بالقانون.
المستشار القانوني والبرلماني
احمد شوشة
المحامي بالاستئناف ومجلس الدولة
