شريف الحسيني يوجه رسالة قاسـ.ـية لـ أفيخاي أدرعي”
وجه الإعلامي شريف الحسيني رسالة قاسية إلى أفيخاي أدرعي المتحدث باسم جيش الاحتلال الإسرائيلي قال فيها:( التاريخ والجغرافيا والواقع والحقيقة بيقولوا إن سيناء مصرية وهتفضل مصرية ، وصراحة بقه وأنا بتكلم عن التاريخ والجغرافيا وسيناء نفسي أقول كلمتين محشورين في زوري لأفيخاي أدرعي اللي كل شوية يطلع يكلمنا بالعربي عن سينا والعرب ..عايزة أقولك إن محدش بيصدق أي كلمة من كلامك.. إنت مستفز فعلا.. ول ما يشوفك أي مصري ولا عربي دمه بيفور.. وكلامك بيفوره أكتر.. مش عارف هو أنت مبتشوفش التعليقات اللي الناس بتكتبها لك .. ولا بتشوفها وعامل من .... مش عارف أقولك عامل منين .. بنقول عندنا عامل من بنها .. بس أنت ملكش بلد فمش عارف أقولك عامل منين ..
ياريت تسكت .. ياريت تشغل وضع الصامت على طول .. لأنك بصراحة غير مقبول بالمرة)
وتابع خلال برنامجه ساعة من مصر المذاع عبر قناة الحدث اليوم : (عايز أوريك صورة كده هتعجبك قوي ..علشان تعرف الفرق بين صاحب الأرض والحق.. والدخيل المحتل .. شايف صاحب الأرض قاعد واثق من نفسه إزاي .. وشايف المحتل الدخيل بيهرب إزاي أول ما يحس إنه فيه خطر .. ملوش وطن هيقعد ليه ويدافع عن مين .. لازم يجري ويهرب .. يارب تسكت وتريحنا.. عايز أقولك كمان أنتم عارفين طبعا يعني إيه مصر.. ويعني إيه جيش مصر.. لازم تعرف وتذاكر إن شعب مصر ورا جيشه ورئيسه.. وأكيد شوفتم الملايين اللي نزلوا الشارع يفوضوا الرئيس في أي قرار لحفظ أمن مصر.. أما جيش مصر فحدث ولا حرج .. بس محدش يعرف يسحبه أو يقحمه في أي حاجة.. ومصر بتحتفظ بحق الرد لما تقرر هي .. مش لما يقرر أي حد.. وفلسطين هتفضل فلسطين مهما عملتم.. والصواريخ وصلت عمق تل أبيب.. علشان تموتوا أكتر من الخوف والذعر.. يارب تكون الرسالة وصلت.. وعايز أعرف العالم كله إن إسرائيل بتخبي الأخبار اللي تهد معنويات الناس عندها.. بس احنا لازم نقولها علشان نهدها ونرفع معنوياتنا .. إمبارح المقاومة ضربت مبنى لجهة مهمة في منطقة رامات هشارون بتل أبيب وسقط عشرات القتلى والجرحى .. تقدر تنكر يا أدرعي .. متقدرش طبعا).
