النائب السابق محمد عبد العزيز يتساءل .. ليه حزب الجبهة الوطنية أفشل الأحزاب المصرية؟
شن محمد عبد العزيز وكيل لجنة حقوق الإنسان السابق هجوماً شديداً علي حزب الجبهة الوطنية واصفا إياه بانه افشل حزب سياسي
وكتب عبد العزيز علي حسابه علي فيسبوك قائلاً: "بوست طويل شوية معلش لو في جايزة لأكثر الأحزاب السياسية فشلا هو وإدارته ، هختار بضمير مستريح حزب الجبهة الوطنية وإدارته " وعارف ان الكلام ده ممكن يزعل مني البعض.. لكن حقي اقول رايي بكل حرية ..
واضاف عبد العزيز : " وانا مش عضو في اي حزب فبقول رايي من منظور محايد تماما.. وأي حزب سياسي أو تجربة سياسية بحاجة إلى فترة ما لتقييم نجاحها أو فشلها وجدوى وجودها وإضافتها للحياة السياسية.. والحقيقة ببساطة حزب الجبهة لا يعلم أبجديات العمل السياسي والحزبي "
وأوضح عبد العزيز ان حزب الجبهة الوطنية من اللحظة الأولى مش عارف هو مؤيد ولا معارض .. حزب يسألوه عن توجهاته يقول أنا لا معارض ولا مؤيد!!.. ما هو لو مؤيد ليه مؤسسيه مدخلوش حزب الأغلبية ؟!.. ولو معارض لماذا لم يضبط متلبسا بأي موقف مختلف فيه مع الحكومة؟!
واكمل عبد العزيز كلامه قائلا :
ولو مكانش لا ده ولا ده اومال هو إيه؟ .. منعرفش!.. الحزب قدم نفسه باعتباره وافد جديد للحياة السياسية.. واستبشرنا بيه خيرا خاصة مع تصريحات قياداته.. اللي قالوا بوضوح احنا مش هنوزع كراتين ..فقولناااا ياااااه الحمد لله .. أخيرا حزب فاهم إن ده مش دور الأحزاب .. وبعد كدة وزعوا كراتين عادي جدا!!.. وقال الحزب بعدها كلام يضحك من نوعية اصلنا بنوزع بعد الانتخابات!! .. لا حضرتك هي الاحزاب مش بتوزع كراتين المفروض أصلا!.. دي شغلة الجمعيات الأهلية.. ده دور المجتمع المدني.. ليه الاحزاب ميصحش توزع كراتين؟! .. لان دي ممكن تتفهم إنها رشوة انتخابية حضرتك .. ده ممكن يتفسر إنه نوع من الفساد السياسي حضرتك .. ومافيش حاجة اسمها انا موزعتش في الانتخابات.. لانك بتوزع في اي وقت على مدار السنة بهدف تربط صاحب الحاجة بالحزب وشعار الحزب.. عشان وقت الانتخابات تستغل عوزه وحاجته وتقوله صوت لمرشح الحزب.. ولو انتوا حزب غني ربنا يبارك لكم طبعا.. وعايزين تعملوا خير.. ده يبقى كرم أخلاق منكم والله.. ده شيء جميل والله.. اتبرعوا بالخير ده للجمعيات الاهلية توزع هي .. عارف ليه؟ لان في القانون الجمعيات الاهلية الخيرية ليس من حقها الدعاية الانتخابية لمرشح دون الاخر .. وده غير الاحزاب ..(بالمناسبة بقى مرشحيي حزب الجبهة وزعوا في الانتخابات نفسها اصلا بس ما علينا ).. المهم بقى إن الأحزاب شغلتها تعمل سياسات وتهدف للوصول للأغلبية عشان تحكم وتنفذ هذه السياسات (حزب الجبهة برضه قالوا مش عايزين الاغلبية) .. اومال عايزين ايه يا جماعة؟! .. يعني ايه حزب يطلع يقول لا اهدف للوصول للاغلبية ومش عايز احكم؟! .. حزب مش معارض ومش مؤيد!!.. فين ده في كوكب الارض بجد؟! .. نعم ؟ انتوا بتخترعوا سياسة جديدة يا جماعة .. الأحزاب في العالم جيس وااااات هدفها تحكم يا جماعة.. شغلها الشاغل تتبنى سياسات مقنعة للمواطن عشان ينتخبها فتاخد الأغلبية يا جماعة .. ولذلك بتتبارى تقنع الناخب يصوت لها .. عشان تنفذ سياستها وبرنامجها.. ده مش اختراع يعني عشان تقولي لا والله ماليش في حوار الأغلبية والحكم ده .. انا اسف اني فاجئتك عزيزي حزب الجبهة يعني.. بس هو ده دور الأحزاب أصلا .. اما حزب الجبهة على المستوى الشعبي بقى.. حدث ولا حرج .. من اول اختيار مرشحيه اللي هما اصلا معظمهم كانوا في أحزاب أخرى وفشلوا في الحصول على ترشيح أحزابهم فراحوا الجبهة .. بالإضافة ان النتايج على الأرض بتقول ضعف شعبية مرعب للحزب ولاختيارته في مرشحيه .. لدرجة ان عدد المقاعد اللي حصل عليها في القايمة ضعف اللي فاز بيها في الفردي تقريبا .. وخسر مرشحيه على المقاعد الفردية في الانتخابات خسائر فادحة في مختلف المحافظات .. وحتى الآن لم يستكمل الحزب تشكيلاته في كتير جداااا من الوحدات الحزبية.. وحتى التشكيلات اللي تمت فيها انعزال تام عن القيادات الشعبية الحقيقية في القرى والأحياء وبيعتمد على أضعف كادر حزبي في معظم التشكيلات.. حزب اتوفر له إمكانيات مالية هائلة .. ودعم سياسي وإعلامي كبير جدا .. وعشان كدة حقنا نناقش ونقيم التجربة وإدارتها وجدوى دورها في الحياة الحزبية والسياسية.. يعني من حقنا نسأل إيه الإضافة اللي أضافها حزب الجبهة مختلفة عن باقي أحزاب الأغلبية مثلا ؟! .. وبعدين يكون أداءه السياسي إنه مش عارف دور الأحزاب إيه؟ لا عايز الأغلبية ولا مؤيد ولا معارض .. وأداؤه الشعبي إنه بيخسر كل الخسائر الفادحة دي على الأرض.. ونسألهم أخيرا .. حزب الجبهة الوطنية.. انتي جاية اشتغلي ايه؟!
وفي النهاية الخلاف في الرأي لا يفسد للوطن قضية كما قال السيد الرئيس .
