النائبة أميرة أبوشقة تكتب ساخرة: العدادات الكودية أزالت الفوراق الطبقية والجميع متساوون أمام صدمة فاتورة الكهرباء
كتبت النائبة أميرة بهاء الدين ابوشقة، عضو مجلس النواب على صفحتها الرسمية على فيس بوك أنه ولأول مرة في تاريخ العدالة الاجتماعية في مصر، الحكومة نجحت أخيرًا في تحقيق المساواة الكاملة بين المواطنين. الكل بقى بيُصعق وبيتلسوع بنفس الطريقة..
وأضافت أن الفقير مش قادر يفهم فاتورة الكهرباء، ولا قادر يشحن العداد الكودي قبل ما يفصل، وهو بيحمّر لمبة الإنذار كأنه جهاز كشف الكذب.
وتابعت : للأسف، اختفت فجأة الفوارق الطبقية في شرائح الفقراء القابعة جميعها تحت خط الفقر، أمام شريحة سعرية واحدة غير معلنة عنوانها “ادفع وانت ساكت”، أو "ادفع بالتي هي أحسن"!
زمان كانوا بيقولوا الدعم رايح لمستحقيه، دلوقتي الفاتورة رايحة للضحايا بالتساوي، والعداد الكودي بقى أذكى من المواطن، لأنه بقى بيحاسبك على النفَس، ويخصم الرصيد قبل ما تشغل اللمبة، وكأنه داخل معاك في جمعية شهرية على حساب أعصابك!
بصراحة المشهد عبثي لدرجة إنك تضحك وانت بتتألم في نفس الوقت.
المواطن بيطفي المروحة خوفًا من الفاتورة، ثم يكتشف أن العداد أكل الرصيد وهو نايم!
الناس لم تعد تسأل: “استهلكنا كام"؟، بل: “هو العداد زعلان مننا ليه"؟
وقالت في نهاية منشورها "طبعًا في كل شهر نكتشف اختراعًا جديدًا في فنون الجباية تحت شعار التطوير والتحول الرقمي، بينما المرتبات ما زالت تعمل بنظام العداد القديم، بطيئة وبتفصل آخر الشهر، وعلى ما يبدو فإن حكومتنا الرشيدة قررت أخيرًا تطبيق العدالة الناجزة، أي الجميع متساوون أمام صدمة فاتورة الكهرباء".
