س و ج عن تعديلات محمد فؤاد لقانون الخدمة المدنية
احمد فوزى بوابة البرلمانتناقش لجنة القوي العاملة بمجلس النواب التعديلات التي تقدم بها النائب محمد فؤاد لقانون الخدمة المدنية وذلك علي مدار يومي ١٨ و١٩ نوفمبر الجاري .
ونعرض هنا "س" و "ج"
عن مشروع تعديل بعض أحكام قانون الخدمة المدنية الصادر بالقانون رقم 81 لسنة 2016
بداية :
ناس كتير بتبعت متحفظة على تعديلات
ناس تانية بتبعت تستفسر
ناس تالتة باعتة تقول نستونا
وتعليقات وأسئلة وحاجات تانية كتير حبينا نوضحها في التقرير ده بشكل مبسط بعيدا عن الصياغات القانونية والرسمية والتعقيدات دي
ركزوا معانا..
1- ايه هي الدرجة الشخصية؟
هي درجة بتتمول من الصناديق الخاصة وتدعمها خزانة الدولة في حال عدم وجود موارد مالية بالصندوق.
2- ايه الفرق بين الدرجة الشخصية والدرجة الدائمة؟
الدرجة الدائمة هي درجة مستمرة مش مرتبطة بشخص الموظف فلو إنتهت خدمة الموظف لأي سبب تبقى الدرجة وتكون فاضية وبتتمول بالكامل من الموازنة العامة من خلال موازنة الوحدة اللي بتقدمها للسلطة المختصة بيها وبيعتمد لها فلوسها من خلال الباب الأول أجور ومرتبات بند الأجور الدائمة.
الدرجة الشخصية هي درجة مرتبطة بشخص الموظف بتنتهي بإنتهاء خدمته يعني الموظف موجود الدرجة موجودة غير كده لا الوضع الحالي هي بتتمول من الصندوق والمالية بتمولها لو مفيش موارد في الصندوق وده بيسبب تأخير في مرتبات ناس كتير.
3- ايه الهدف من تعديل تعريف الموظف في قانون الخدمة المدنية؟
ناس كتير كانت منتدبة وخلافه اتلغى لهم كل ده بسبب ان الموظف في قانون الخدمة المدنية هو كل من يشغل وظيفة في الوحدة والوظيفة دي مدرجة في موازنة الواحدة يعني لو شغال في الوحدة بس مدرج على صندوق متعتبرش من بين الموظفين المستحقين للمزايا والحقوق المنصوص عليها في الخدمة المدنية وده حصل في "الجمارك، المحليات، والخ"
عشان كده عدلنا التعريف عشان يكون اكثر شمول ويحتوي كافة العاملين بالوحدة أيا كان بقا على صندوق أو عقد مؤقت أو يومية أو متثبت أوخلافه.
4- طب إيه اللي قدمته جديد عشان التثبيت أو الصناديق؟
بصوا يا أساتذة ..
أولا - إحنا جعلنا النص ملزم للحكومة أن مجرد ميمر عليك 3 سنين متواصلة على بند اجور موسمية إنك تتثبت مباشرة وده حق ليك
ثانيا - حددنا مدة لا تتجاوز 6 شهور عشان الحكومة تكون ثبتتك من تاريخ تقديمك طلب التثبيت اللي هتقدمه بنفسك وهقولك كمان شوية هتقدمه فين وإزاي
ثالثا - ألزمنا الحكومة تنقل كل العاملين على حساب صناديق خاصة وده يشمل العقود بكافة انواعها او المثبتين على الصناديق على درجة شخصية بس إشترطنا إن الدرجة الشخصية دي تتمول بالكامل من الموازنة وملناش علاقة بموارد الصناديق
رابعا- قولنا الكلام ده يحصل خلال مدة متزيدش عن سنتين من صدور التعديل عشان أنت كموظف تعرف موعد واضح و حاسم ونهائي لمشكلتك
خامسا- ضيفنا ان كمان تحتفظ لنفسك بأقدمية بس متزيدش عن 5 سنين يعني لو معاك أقدمية 6 سنين سمحنا في السنة وده المتعارف عليه قضائيا.
5- طب ليه نتثبت على درجة شخصية مش دائمة؟
مش هتفرق معاك درجة شخصية او دائمة طالما أنت بتتمول بالكامل من الموازنة زيك زي المتثبت دائم ولك نفس الحقوق والمميزات لكن دي تفرق مع الحكومة في خطة هيكلة الجهاز الإداري للدولة وتخفيف التخمة اللي فيه
6- طيب أنا من الرائدات الريفيات وأحنا بتوع محاضر مجلس الإدارة في مراكز الشباب وإحنا الخطباء وإحنا وإحنا ؟!!!
كلكم موقف واحد وموضوع واحد عايزين تتثبتوا وتخدوا مرتب محترم وثابت الموعد والمقدار وحقوقكم من تأمينات ومعاشات وخلافه اللي جزء كبير محروم منها فكل تلك الشكاوي هي شكوى واحدة وده إجاباته في الأسئلة اللي فوق
7- طب إحنا طلبوا ورقنا وراح ومردوش وكل شوية يخدوا وميردوش أو خدوا مننا جزء وجزء لا؟
طبعا ده له أسباب هي توفير درجة مالية ودرجة وظيفية وخلافه وكمان بعض الأسباب الإدارية والشخصية وكده عشان ده حلينا المشكلة دي واستحدثنا مادة بتنشأ لجنة مختصة باستقبال طلبات التثبيت والتسويات ويكون لها فروع بالمحافظات بتقدم فيها أنت كموظف بشكل مباشر ورقك وبياناتك ويتبت في موضوعك في موعد أقصاه 3 شهور من تاريخ تقديم طلبك مش بس كده ده لازم كل الطلبات والردود تكون كتابة حتى الاستعلام كتابة
ودي مادة هتحميك من أي اخطاء إدارية أو إهمال وتفتحلك مساحة لمتابعة موضوعك وتطمنك وكمان حددنا مدد عشان تعرف راسك من رجلك وحقوقك تكون واضحة ليك.
8- طب ايه مدة 3 شهور دي وفوق قولت 6 شهور وسنتين على التثبيت والصناديق؟
الـ 6 شهور الهدف منهم أن عملية التثبيت يتم في موعد أقصاه 6 شهور من تاريخ تقديم طلبك لكن ال 3 شهور اللي تحت هي انك لما تقدم طلبك يكون اتفحص واتبت فيه وعرفت هتتثبت أو لا أو كمل ورقك أو خلافه في موعد أقصاه 3 شهور مش تقدم الورق وتموت الدنيا بعد كده،
أما موضوع السنتين دي مهلة قصوى عشان الحكومة تقدر توفر موضوع الدرجات الشخصية وتعمل خطة لتنفيذ فكرة نقل العاملين على الصناديق للموازنة لكن برضه لما تروح حضرتك تقدم طلبك في خلال 3 شهور يقولولك انت تمام ناقصك ورق كمله وانت هتبقى في دفعة نقل أمتى مش تتساب كده بتجري ورا السراب.
9- طب الناس اللي بتسأل بقا على التسويات
أولا مدينا فترة التسويات 6 شهور بدل اللي ضاعه حتى صدور اللايحة
ثانيا عملناها الزامية خلال المدة دي عشان فكرة الجوازية أفرغت المادة من هدفها ومضمونها وحرمت ناس كتير
ثالثا استحدثنا مادة تسمح للي اتثبتوا حديثا وهما شغالين في الجهاز الادراي للدولة من سنين وهما شغالين خدوا المؤهل بس مكنوش متثبتين أوخلافه فبيقولوا لهم ملكوش تسوية أو انتم صناديق أوخلافه ملكوش تسوية لا هيكون ليك بس بعد متنتهي السنتين مهلة الحكومة في التثبيت والنقل وتتفتح التسوية وقتها لمدة سنة.
10- طيب أنا وقت متعينت كان معايا مؤهل أعلى ودخلت بالمؤهل الأقل؟
بصراحة الشكوى دي جت بنسبة قليلة أوي وبنعتذر إننا نتبناها لإنها مش متسقة مع رؤيتنا حضرتك وقت مقدمت بمؤهلك الأقل كان قرارك وأنت عارف أنك همشت مؤهلك العالي بإرادتك وده كمان هيكون عبأ كبير جدا على الدولة تنفيذه.
11- طيب إمتى هيطبق الكلام ده؟
تقدمنا بمشروع التعديل بتاريخ 22 اكتوبر 2019 بعد إستكمال وإستيفاء إجراءات تقديمه، المفروض يتعرض على مكتب المجلس ثم ينزل جلسة عامة يتحال فيها الى لجنة المختصة "القوى العاملة" ثم تناقشه من حيث المبدأ ثم تحضر الحكومة وتبدي رأيها ويبدأ مناقشته داخل اللجنة لحد منوصل لصيغة نهائية ثم يتعمل تقرير وينزل جلسة عامة ويتصوت عليه.
12- طيب الإجراءات دي تاخد وقت قد ايه ؟
منقدرش نحدد صراحة لكن نقدر نسعى معاكم أنه يحصل سريعا .