محمد بدر يكتب ..النائب الملاكي
موضوع مكنتش حابب اتكلم فيه بس تقريبا لسه الناس ما اتعلمتش وهو فكرة النائب الخدمى الى هو تجاوزا منا بنقول عليه عضو مجلس النواب أو الشعب طيب هو عشان ما منطولش فى الموضوع
هنختصر فى تعريفه ومهامه وكيفية اختياره
اولا ، النائب شخص بيطلب أنه يمثل الدائرة فى المجلس
ونلاحظ جدا أن هو إلى بيطلب لان فى الغالب محدش من أهل الدائرة طلب من شخص معين الترشيح ده على حد علمى والى حضرتهم على مدى الدورات السابقة .
ثانيا ، وده المهم أن فكرة مهام النائب ترسخت وارتبطت فى أذهان الناس أنه نائب خاص ملاكى خدمات يعنى يتوسط لواحد فى شغلانة يطلع واحد من مشكلة حتى وإن كانت جنائية ينقل واحد من شغلة والخ من الخدمات الخاصة إلى دائما بنلاقى أصحابها متحمسين ليه والحاجة التانية وده مهم ان فى بعض الناس بيلحقوه عشان مصلحة بلدهم وده عشان يعمل خدمة للبلد وده فى حد ذاته شئ جميل جدا مش وحش وأنه مثلا يعمل مكتب بريد ،صرف صحى ،يرصف طريق ماشى كل ده شئ جميل جدا وهى دى بقى مربط الفرس أنهم حصروا مهامه الجليلة فى شوية المصالح دى ونجحت الافلام والمسلسلات والبرامج القذرة فى تأصيل الصورة دى عن عضو مجلس النواب فى حين إن كل المصالح دى شئ واجب على الدولة والمفروض يكون مخطط ليه ولأن الحكومة فى مصر ملهاش دعوة خالص بالكلام ده فا الناس بتاخد النائب على انه الواسطة إلى بتوصل للحكومة مطالب الشعب فى حين أن ده مش شغلته خالص وبتختلف كليا عن مهامه الرئيسة وهى التشريع الى هو اساسا حجر الأساس لإصلاح وتحقيق كل المطالب دى وبالتالى المجلس أصبح لا يملك القدرة على مناقشة القوانين والتشريعات والرقابة على الحكومة
إذن فكرة النائب الخدمى فكرة لابد أنها تتنحى جانبا فى الاختيار وهى دى النقطة التالتة أو الأخيرة
ثالثا .، الاختيار وده بيكون صعب شوية لان ما بنكنش عارفين حاجة فى الغالب عن الشخص المرشح طيب ايه الحل فى حلين ..
- الاول من خلال الندوات أو المؤتمرات إلى بيعملها المرشح وطرح أفكاره وبرنامجه فى التشريع ازاى أنه هيحاول أنه يعرض تشريعات على المجلس تساعد فى دحر الفساد فى المحليات وده شئ مهم جدا وتشريعات تنهى الثغرات فى القوانين وكمان تشريعات تغلظ العقوبات على المرتشين والحرامية وبرضه على تغلظ العقوبات على بعض الجرائم الجنائية الخ..
-،ثانيا فى حالة أنه مش أمكن عقد المؤتمرات دى يبقى فى الحالة دى انا بحبذ على الدرجة العلمية والثقافية للمرشح وده خيار للاسف اضطراري وممكن ما يكنش صائب لكن افضل من انى ادى صوتى لجاهل ما بيعرفش يقرأ ومفروض من حزب من أحزاب وينجح غصب عنى
واخيرا فكرة الناس تاخد ورق على النائب وتلزمه بعمل خدمات لن تغير الواقع ويصبح النائب نائم فى البرلمان. وشكرا
